"އިންފްލަމޭޓަރީ ބްރެސްޓް ކެންސަރު" އާ ބެހޭ މުހިއްމުމައުލޫމާތު.

"އިންފްލަމޭޓަރީ ބްރެސްޓް ކެންސަރު" 

ޑރ.މުހައްމަދް ޝިފާން

ތައާރަފް އޮކްޓޫބަރު - ބްރެސްޓް ކެންސަރު އާ ބެހޭ ހޭލުންތެރިކަމުގެ މަހު | އޮކްޓޫބަރު 4 - އިންފްލަމޭޓަރީ ބްރެސްޓް ކެންސަރު އާ ބެހޭ ހޭލުންތެރިކަމުގެ ދުވަހެވެ. އޮކްޓޯބަރ މަހަކީ ހޭލުންތެރިކަމުން ފުރާނަ ސަލާމަތްކުރެވޭކަން ހަނދާންކޮށްދޭ މަހެކެވެ.

އޮކްޓޫބަރު މަހަކީ ދުނިޔޭގެ ފެންވަރުގައި އުރަމަތީގެ ކެންސަރު އާ ބެހޭ ހޭލުންތެރިކަމުގެ މަހެއްގެ ގޮތުގައި ފާހަގަކުރެވޭ މަހެކެވެ. މިއީ އަވަހަށް ބަލި ދެނެގަތުމުގެ މުހިންމުކަމާއި، ވަގުތުން ފަރުވާ ހޯދުމާއި، އަދި މި ބައްޔަށް ހުށަހެޅޭ މީހުންނަށް އެހީތެރިވުމުގެ މުހިންމުކަން ފާހަގަކުރުމުގެ ވަގުތެކެވެ. ހުރިހާ ބާވަތެއްގެ ބްރެސްޓް ކެންސަރުގެ ތެރެއިން، އެންމެ މަދުން ފެންނަ ނަމަވެސް އެންމެ ނުރައްކާތެރި ބާވަތްތަކުގެ ތެރެއިން އެއް ބާވަތަކީ އިންފްލަމޭޓަރީ ބްރެސްޓް ކެންސަރު (އައިބީސީ) އެވެ. މިއީ ޚާއްޞަ ސަމާލުކަމަކާއި ހޭލުންތެރިކަމެއް ބޭނުންވާ ބައްޔެކެވެ. ކޮންމެ އަހަރެއްގެ އޮކްޓޫބަރު 4 ވަނަ ދުވަހަކީ އިންފްލަމޭޓަރީ ބްރެސްޓް ކެންސަރު އާ ބެހޭ ހޭލުންތެރިކަމުގެ ދުވަހުގެ ގޮތުގައި ފާހަގަކުރެވެއެވެ. މި ދުވަހަކީ ގިނަ ފަހަރު އޮޅުން އަރާ މި ބައްޔާ ބެހޭ މަޢުލޫމާތު ފެތުރުމަށް ޚާއްޞަކުރެވިފައިވާ ދުވަހެކެވެ.

އިންފްލަމޭޓަރީ ބްރެސްޓް ކެންސަރު ދެނެގަތުން

އިންފްލަމޭޓަރީ ބްރެސްޓް ކެންސަރަކީ ހުރިހާ ބްރެސްޓް ކެންސަރުގެ ތެރެއިން އެންމެ 5-1 އިންސައްތަ އެކަނި ހިއްސާކުރާ ބާވަތެކެވެ. ނަމަވެސް، މި ބައްޔަކީ އޭގެ އަވަސް ކުރިއެރުމާއި އަވަހަށް ދެނެގަތުމުގެ ދަތިކަމުގެ ސަބަބުން، ބްރެސްޓް ކެންސަރާ ގުޅުންހުރި މަރުތަކުގެ ނިސްބަތުން ބޮޑު ބައެއް ހިއްސާކުރާ ބައްޔެކެވެ. އެހެން ބާވަތްތަކާ ޚިލާފަށް، "އައި.ބީ.ސީ" އާންމުކޮށް ގަނޑެއްގެ ސިފައިގައި ނުފެނެއެވެ. އޭގެ ބަދަލުގައި، މި ބަލީގައި ކެންސަރު ސެލްތަކުން "ލިންފެޓިކްސް" ގެ ހޮޅިތައް ބައްދާލައެވެ. މިކަމުގެ ސަބަބުން ގައިގެ ހަމުގައި ރަތްކަމާއި، ދުޅަވުމާއި، ހޫނުވުން ފަދަ ކަންތައްތައް ފާހަގަކުރެވެއެވެ. މިއީ ގިނަ ފަހަރު ކެންސަރަށްވުރެ ބޮޑަށް އިންފެކްޝަނެއް ކަމަށް ހީވާ ކަހަލަ އަލާމާތެކެވެ.

އާންމު އަލާމާތްތަކާއި ނިޝާންތަކުގެ ތެރޭގައި ހިމެނެނީ: •ވަރަށްބާރަށް އުރަމަތި ރަތްވެ، ދުޅަވެ، އަދި ހޫނުވުން. • ހަން ބޯވެ ނުވަތަ ވަޅު ޖެހުން (ނާރިންގު މޭވާގެ ތޮށި ފަދައިން). • ވައްގަނޑު އެތެރެއަށް ވަނުން ނުވަތަ ކުއްލިއަކަށް އުރަމަތީގެ ބައްޓަމަށް ބަދަލު އައުން. • އުރަމަތީގައި ރިހުން، އަދި ބަރުވުން. • ކިހިލިފަތުގައި ނުވަތަ މޭކަށިގަނޑުމަތީ ކައިރީގައި ހުންނަ "ލިމްފް ނޯޑް"ތައް ދުޅަވުން.

އައި.ބީ.ސީ ބާރަށް ފެތުރޭތީ – (ބައެއް ފަހަރު ހަފްތާތަކެއް ނުވަތަ މަސްތަކެއްގެ ތެރޭގައި) - މި ބަލި ދެނެގަތުމުގައި ލަސްވުމުގެ ސަބަބުން ބަލި ދެނެގަންނައިރު އެއަށްވުރެ ކުރިއަރާފައިވާ މަރުޙަލާއަކަށް ގޮސްފައި އޮވެދާނެއެވެ.

އަވަހަށް ދެނެގަތުމުގެ މުހިންމުކަން

ސައިންޓިފިކް ހެކިތަކުން ދައްކާގޮތުގައި އައި.ބީ.ސީ އާންމުކޮށް ދެނެގަނެވެނީ ސްޓޭޖް 3 ނުވަތަ 4 ގައެވެ. އެއީ މި ބަލީގެ އަލާމާތްތައް "މަސްޓައިޓިސް" ނުވަތަ "ޑަރމަޓައިޓިސް" ފަދަ ނުރައްކާތެރިނޫން ބަލިތަކާ އެއްގޮތްވާތީއެވެ. އެމެރިކަން ކެންސަރ ސޮސައިޓީ (2024) ގެ މަޢުލޫމާތު ދައްކާގޮތުގައި ވަކި ދުރަށް ނުފެތުރި ހުންނަ އައި.ބީ.ސީ އަށް 5 އަހަރު ދިރިހުރުމުގެ ރޭޓަކީ% 56 އެވެ. ނަމަވެސް މި ބަލި ފެތުރެމުންދާ ވަރަކަށް މި ރޭޓު ވަރަށް ބޮޑަށް ދަށްވެއެވެ.

އެހެންނަމަވެސް، އަވަހަށް ދެނެގަތުމާއި ޒަމާނީ ފަރުވާތަކުގެ ސަބަބުން ނަތީޖާތައް ރަނގަޅުވަމުންދެއެވެ. ދިރާސާތަކުން ދައްކާގޮތުގައި "ނިއޯއެޑްޖުވެންޓް" ކީމޯތެރަޕީ، ސަރޖަރީ، އަދި ރޭޑިއޭޝަން ފަރުވާ އެއްކޮށް ދޭ ފަރުވާއިން ދިރިހުރުމުގެ ރޭޓު ވަރަށް ބޮޑަށް އިތުރުވެއެވެ. ފަހަކަށް އައިސް، "ޓާގެޓެޑް ތެރަޕީތައް" ކަމުގައިވާ ހަރރ2 އިންހިބިޓަރސް (ޓްރަސްޓުޒުމަބް، ޕަރޓުޒުމަބް) އަދި "އިމިއުނޯތެރަޕީ"ތަކުން ވަރަށް އުންމީދީ ނަތީޖާތަކެއް ދައްކާފައިވެއެވެ. މިއީ "އައި.ބީ.ސީ" ފަދަ ނުރައްކާތެރި ކެންސަރަށް ފަރުވާކުރާ ބަލިމީހުންނަށް އާ އުންމީދުތަކެއް ގެނެސްދޭ ކަމެކެވެ.

"މިސްޑައިގްނޯސިސް"ގެ ގޮންޖެހުން

"އައި.ބީ.ސީ" ބަލީގެ އެންމެ ބޮޑު އެއް ގޮންޖެހުމަކީ އެއީ ގިނަފަހަރަށް އިންފެކްޝަން (މެސްޓައިޓިސް) ގެ ގޮތުގައި ނުބައިކޮށް ދެނެގަނެވުމެވެ. ޚާއްޞަކޮށް ޅަ އުމުރުގެ އަންހެނުންނާއި ގާތުން ކިރުދޭ މައިންގެ މެދުގައެވެ. އެންޓިބައޮޓިކްސް ބޭނުންކުރުމުން ވަގުތީގޮތުން އިންފްލަމޭޝަން ކުޑަވިޔަސް، އަލާމާތްތައް ހަފްތާއަކަށްވުރެ ދިގުލައިފިނަމަ، ވަގުތުން މެޑިކަލް އެސެސްމަންޓަކާއި އިމޭޖިންގ (އަލްޓްރާސައުންޑް ނުވަތަ މެމޮގްރާމް) ހަދަންވާނެއެވެ. އަދި އޭގެ ފަހުން "އައި.ބީ.ސީ" އެއްކަން ކަށަވަރުކުރުމަށް "ބައޮޕްސީ"އެއް ހަދަންވާނެއެވެ.

އެހެންކަމުން، ބަލިމީހުންނާއި ޞިއްޙީ ޚިދުމަތްތެރިން މިބަލި އަވަހަށް ދެނެގަތުމަކީ ވަރަށް މުހިންމު ކަމެކެވެ. ހޭލުންތެރިކަން އިތުރުކުރުމަކީ ފަރުވާކުރެވޭ ވަރުގެ ބައްޔަކާއި ފުރާނައަށް ނުރައްކާވެފައިވާ ކެންސަރަކާ ދެމެދު ހުރި ތަފާތެވެ.

ހޭލުންތެރިކަމާއިއެކު އުންމީދު އާލާވުން..

އޮކްޓޯބަރ މަހަކީ ހޭލުންތެރިކަމުން ފުރާނަ ސަލާމަތްކުރެވޭކަން ހަނދާންކޮށްދޭ މަހެކެވެ. އިންފްލަމޭޓަރީ ބްރެސްޓް ކެންސަރުގެ ޚާއްޞަ އަލާމާތްތައް އެނގި، އުރަމައްޗައް ކުއްލިއަކަށް އަންނަ ބަދަލުތަކަށް އަހަމިއްޔަތުކަން ދިނުމުން، އަވަހަށް ބަލި ދެނެގަނެ، ރަނގަޅު ނަތީޖާތަކެއް ހޯދިދާނެއެވެ.

މިއަހަރުގެ އޮކްޓޯބަރު 4 ވަނަ ދުވަހަކީ އިންފްލަމޭޓަރީ ބްރެސްޓް ކެންސަރ އަށް ހޭލުންތެރިކަމުގެ ދުވަހެވެ. މިދުވަސް ފާހަގަކުރަމުން އަންނަނިވި ކަންކަމުގެ މައްޗަށް މަޢުލޫމާތު ފެތުރުމަށް މަސައްކަތްކުރަމާ ހިންގަވާށެވެ: • އަންހެނުންނާއި ފިރިހެނުން ވެސް އުރަމައްޗައް އަންނަ ބަދަލުތަކަށް ސަމާލުވުމަށް ބާރުއަޅަމާ ހިންގަވާށެވެ. • ޞިއްޙީ ޚިދުމަތްތެރިންނަށް، އާދަޔާ ޚިލާފު ގޮތަކަށް އުރަމަތީގައި ފެންނަ ކަންކަމުގައި އައި.ބީ.ސީ އަށް ރިޢާޔަތްކުރުމަށް ހަނދާންކޮށްދެމާ ހިންގަވާށެވެ. • އަވަހަށް ބަލި ދެނެގަތުމަށް ބޭނުންކުރާ ވަސީލަތްތައް ރަނގަޅުކުރުމަށް ކުރެވޭ ދިރާސާތަކާއި، މަސައްކަތްތަކަށް އެހީތެރިވަމާ ހިންގަވާށެވެ.

ނިންމާލުން

އިންފްލަމޭޓަރީ ބްރެސްޓް ކެންސަރަކީ މަދުން ޖެހޭ ބައްޔެއް ނަމަވެސް، އޭގެ އަސަރު ވަރަށް ބޮޑެވެ. ހޭލުންތެރިކަމާއި، ވިސްނުންތެރިކަމާއި، ވަގުތުން މެޑިކަލް ސަމާލުކަން ދިނުމަކީ އަޅުގަނޑުމެންގެ އެންމެ ވަރުގަދަ ހަތިޔާރެވެ. މި އުރަމަތީ ކެންސަރ ހޭލުންތެރިކަމުގެ މަހުގައި، ހަނދާންކުރަމާ ހިންގަވާށެވެ - ހުރިހާ އުރަމަތީގެ ކެންސަރެއް ގޮށެއްގެ ގޮތުގައި ނުފެންނާނެއެވެ. އަދި ކޮންމެ އަލާމާތަކަށްވެސް ސަމާލުކަން ދޭންޖެހެއެވެ.

އަވަހަށް ބަލި ދެނެގަތުމުން ފުރާނަ ސަލާމަތްކުރެވިދާނެއެވެ - ހޭލުންތެރިކަމަކީ އެންމެ ފުރަތަމަ ފިޔަވަޅު ކަމުގައި ހަދަމާ ހިންގަވާށެވެ.

ނޯޓް:

އިންފްލަމޭޓަރީ ބްރެސްޓް ކެންސަރުގެ ހުރިހާ ބާވަތްތަކެއްގައިވެސް އެއް ކަހަލަ ކްލިނިކަލް އަލާމާތްތަކެއް - ރަތްވުމާއި، ދުޅަވުމާއި، އަދި އަވަހަށް ފެތުރުން - ފެންނަ ނަމަވެސް، އޭގެ ބައޮލޮޖިކަލް ވައްޓަފާޅި ތަފާތުވެއެވެ. މިގޮތުން ހޯމޯން އަދި އެޗްއީއާރު2 ރިސެޕްޓަރ ސްޓޭޓަސްއަށް ބަލައި މި ތަފާތުތައް ފާހަގަކުރެވެއެވެ. މި ސަބްޓައިޕްތައް ދެނނެގަތުމުން އޮންކޮލޮޖިސްޓުންނަށް ފަރުވާގެ ޕްލޭންތައް އެކަށައެޅުމުގައި އެހީތެރިވެދެއެވެ. މިގޮތުން ބަލިން ރަނގަޅުވުމުގެ ނަތީޖާ ރަނގަޅުކުރެވެއެވެ.

References:

   1.         American Cancer Society. Inflammatory Breast Cancer Overview, 2024.

   2.         U.S. National Cancer Institute. SEER Cancer Statistics Review, 2023.

   3.         Dawood S. et al. Inflammatory Breast Cancer: Epidemiology and Clinical Outcomes. Breast Cancer Research and Treatment, 2022.

            4.         Cancer Research UK. Inflammatory Breast Cancer: Signs, Diagnosis, and Treatment, 2023